Hey visitor!

1982

في عام 1982 دخلت المدرسة و كانت مدرسة الأماني الوطنية و التابعة لدار العقل للتربية و التعليم. كنت طبعا سنة تمهيدي و المدرسة أكيد كانت بنين و بنات. بالنسبة للبنات, كانت تمتد الى نهاية المرحلة الإبتدائية. هناك كانت أختي تدرس و أخت تاج سلامة و اللي تعرفوا على بعض بحكم معرفة والدي السابقة بعم خالد سلامة من ايام ما كانوا الإتنين صحفيين. و بالتالي اصبحنا انا و تاج اصدقاء و بالفعل يعتبر تاج أول صديق عرفته في حياتي و اقدم صديق لأنه بحسبة بسيطة نقدر نقول اننا اصدقاء من 27 سنة.

من نهاية 1983 الى 1984

في نهاية عام 1983 وحتى بداية النصف الأول من 1984 دخلت مدارس النصر النموذجية (دا كان إسمها بدون زيادة او نقصان). كنت سنة أولى ابتدائي و كنا في فصل الأستاذ عبد الرؤوف (ما ادري لو احد فيكم يفتكره) على العموم, هناك كنا اكيد انا و تاج بتدبير مسبق من أيام التمهيدي في فصل واحد. في ديك السنة اتعرفت على هتان الشريف و أحمد كوشك و أحمد غلاييني و يحيى ابراهيم حيث انهم كانو معايا في نفس الفصل.

1985

في دا العام كنا في الصف الثاني الإبتدائي في فصل الأستاذ فتحي (أكيييييد فاكرينه و فاكرين قد إيش كان جبار, يالله الله يسامحه!!) طبعا في دي السنة اتعرفت على الواد المارديني و على فكره ممكن البعض يستغرب بس جاتنا فترة جلسنا جنب بعض (لول) والله من جد. على كل حال من الشلة اللي كانت في الفصل: (هتان, فراس المارديني, تاج, أحمد كوشك, أحمد غلاييني, يحيى, شفيق السراج, وانا)

1986

الصف الثالث الإبتدائي, في فصل الأستاذ مصطفى (كان إنسان محترم  ومربي فاضل, الله يغفرله و يسامحه) مافي اي عنصر جديد نفس الناس اللي كانو في تانية هم نفسهم في تالتة.

1987

الصف الرابع الابتدائي, طبعا مستجدات مفصلية في عمر شلتنا. انتقلنا انا و يحيى لفصل غير فصل الشلة اللي فضلت سوا الين تالتة ابتدائي. و هما (هتان, فراس المارديني, تاج, أحمد كوشك, أحمد غلاييني , شفيق) انتقلوا الى فصل غير. و في الفصل اللي كنا فيه انا ويحيى كان جالس ورانا فراس الخطيب و حسان بخاري ودا كان فصل الأستاذ أحمد سعد ( أكيد فاكرينه, واللي مو فاكر انا افكره, بس لأنه انا ما ابغى اكتب اشياء سلبية هنا!!). و اتعرفنا على بعض بسرعة طبعا و صرنا شلة في داك الفصل. برضه كان في حبيبنا خالد العمودي واللي اتعرفت عليه ديك السنة. للأمانة انا اعتبر فراس الخطيب هو المؤسس الفعلي للشلة دي لأنه هو اللي بدأ حكاية الزيارات للبيوت و بدأها ببيته و افتكر والله اول ربوع اروحه في حياتي كان في بيت فراس و ابويا الله يديله الصحة والعافية بنفسه وصلني. طبعا يحضرني اني اقول انه في ديك الفترة اتعرفت كمان على حاتم بخاري و كانت شلتنا عبارة عن فراس, حسان منصور, حسان بخاري, حاتم بخاري.في حاجة مهمة ابغى أوضحها, اكيد شلتنا ما كانت بس حاوية لينا احنا اللي نعرف بعض, مر على شلتنا خليني اقول زوار استمروا في الربوعية سنة او اتنين أو اكتر بس ما استمروا الى الأن و من ضمن هدول كان ماجد وصفي, وماجد مبروك برضه اقدر اقول نفس الكلام على شفيق السراج لأنه قطع بعد اولى ثانوي كما سيتبين لاحقا. ارجع لموضوعنا الأساسي, طبعا اكيد العلاقات كانت زي ما هي مع العالم اللي في الفصل التاني بس طبعا اكيد اللي بعيد عن العين بعيد عن القلب.

1988

الصف الخامس الإبتدائي, أظن انه كان فصل الأستاذ الفاضل محمد الفقي. برضه نفس الشلة حقت رابعة بإستثناء انه خالد ابتدا يجي كم ربوع (ما كن منتظم, بس جا على ربوعات متقطعة) الين خامسة و يحيى ما كان بيجي أي ربوع.

1989

سادسة ابتدائي, من اهم المراحل في عمر الشلة أولا طبعا لأنه كانت نهاية المرحلة الإبتدائية و بداية النضوج و دخول المتوسطة و كان دا بالنسبة لنا شي مرة كبير, الأهم طبعا انه ربنا جمع الشلتين  اللي في عناصر منهم (أنا) مشتركة. في سادسة ابتدائي كل العناصر اللي في داك الفصل استمر اغلبها الى يومنا دا. فمن وجهة نظر واقعية, سادسة ابتدائي هي ميلاد شلتنا بكل عناصرها, حيث انه اللي كانوا في الفصل (أحمد غلاييني, أحمد كوشك, تاج سلامة, حسان منصور, حسان بخاري, فراس مارديني, فراس الخطيب, خالد العمودي, هتان الشريف) وطبعا من ضمن الشلة دي و لو انهم كانوا اصغر مننا: حاتم بخاري و محمد كوشك اللي انا عن نفسي اتعرفت عليه في ديك السنة. ابتدينا طبعا نشاطات الشلة كل ربوع بشكل مرة منتظم و كل مرة في بيت أحد من اللي فوق. من جد من احلى سنوات عمري حتى في المدرسة كنا تقريبا مافيا و كلمتنا مسموعة. فريقنا حق الكورة كان من أقوى الفرق و فزنا بكل البطولات (لاحظ انه هتان الشريف كان في الفصل واللي ما شاء الله كلنا نعرف كيف كان يلعب) من ضمن زوار الشلة اذكر محمد دقاق اللي اتعرفت عليه في نفس السنة (كان صاحب الشباب في رابع اللي انفصلنا عنهم), راجي العمودي, ماجد مبروك برضه ماجد وصفي.

1990

الصف الأول المتوسط. كانت المدرسة المتوسطة جدييييدة و الأستاذ انيس الزلاقي الله يرحمه هو اللي كلم ابآءنا واحد واحد انه ندخل المتوسطة في مدارس النصر النموذجية (القسم المتوسط و الثانوي). كنا في فصل الأستاذ محمد حق الرياضيات (اديلووو درجة, اكيد فاكرينه, ما شاء الله عليه كان متمكن) كان مديرنا جابر ابو السعود المرعب!! المدرسه كانت ونس و الشلة حقت سادسة زي ما هي و من ديك السنة ابتدينا كلنا نجلس في صف واحد ورا بعض. من أول الفصل الين أخره. طبعا الربوعيات زي ما هي بس افتكر لعب الكورة مرة زااااد ما شاء الله.

1991

الصف الثاني المتوسط, سنة الفلة بجداارة طبعا سنة الحرب برضو (حرب تحرير الكويت) امتدت إجازة نصف السنة الين بعد الحج و المناهج اتقصقص منها شي كثير. برضو بالنسبة للشلة زي ما هي ..افتكر زاد الشغب بشكل فظيع الأصوات و الجنان اللي كان يصير ورا المدرسين (استاذ كم مرة ...كم مرة..) و غيره و غيره. بالنسبة للشلة ..نفس النظام بس الأيام من جد كانت حلوة مرة.

1992

الصف الثالث المتوسط, سنة كانت عادية جدا بس كثرة المشاكل و التوريطات اللي فيها هي اللي جعلتها تميل للكآبة (طبعا انتو عارفين إيش اقصد!!) مافي أي شي جديد غير انه شفيق السراج تم نقله الى الفصل المجاور ..بسبب ؟؟ ..المهم دا كان فصل محمد عبد القادر ابو الهدا (و اٍٍسأل أي مدرس في المدرسة)

1993

الصف الأول ثانوي, من أجمل سنين العمر كلها بالنسبة لي ..من جد كان كل يوم عبارة عن مسرحية ..انا اظن اننا ضحكنا في ديك السنة حق عشر سنين قدام ....الأوضاع زي ما هي و فصلنا كان فصل ميييييين (أحمد حسن سلوكة) برضو فريق الفصل اكتسح كل البطولات.

1994

الصف الثاني الثانوي ...كان رائد الفصل مييييين ؟؟ (محمد عبده حق الكيمياء) من اهم احداث هذه السنة انه أخونا فراس مارديني سابنا و راح ثانوية ابن خلدون. و صار من يوميها يلبس نظارة و مسويييي فيها الواد الدافور (الله يرحم قبلها بسنة) كنت بركان الفصل في السلم و الحرب..طبعا دي كانت خسارة كبيرة بالنسبة لنا ..عضو من اهم الأعضاء انفصل عننا بعد اكثر من عشر سنين مع انه كان بيجي الربوعيات على قد ما يقدر.

1995

اهم سنة على الإطلاق ...طبعا سنة التخرج و الخروج لأرض الواقع ...تقريبا بعد السنة دي, انا سافرت على أمريكا .يحيى سافر مصر ..الغلاييني لحقه بعدها بشوية..المارديني راح الشرقية حسان بخاري التحق بالطب و صرنا نشوفه قليل (في الفترة اللي كنت متواجد انا فيها الين نهاية 1995 ) أحمد كوشك لحقني على أمريكا بعدها بسنة ..فراس الخطيب كمل في عبد العزيز و اتعرف على شلة جديدة ...تاج إدارة و إقتصاد و شلة جديدة.. هتان كان ما بين الجامعة و نادي الوحدة ..وبعدين اظنه دخل الخطوط....ببساطة اتفرتكنا...انا أعرف انه الشباب اللي قعدوا في جدة و اللي بقيو كانوا على اتصال و كانوا بيخرجوا ...انا لما كنت اجي إجازة كنا كلنا نجتمع و لله الحمد.

و أخيرا من التايم لاين دا نقدر نقول انه الخلطة كانت في مرحلة التكوين قبل سادسة ..وبعدين على سادسة اكتملت الخلطة بكل عناصرها...السنين التي تليها كانت سنين استمتاعنا بدي الصداقة و معايشتنا اليومية لها. أكيد انا ما اقدر افتي في الفترة اللي كنت فيها مسافر ..بس اكيد لو الشباب كتبوا حيظهر انه حتى في مرحلة الشتات دي كان في اتصال و لو من عنصرين من عناصر الشلة مع بعض ...طبعا بعد التخرج و حتى بعد العمل و حتى بعد الزواج رجعنا زي ما كنا الحمد لله و كان اول من رجعنا و احيا الربوعية بعد نومها سنوات هو مين ؟؟ طبعا  ا لزعيم فراس الخطيب ..انا من جد اشهد انه زعيم ..دائما هو الرابط ...الله يخلينا لبعض و لا يحرمنا من بعض ولا يغير علينا و يطول في اعمارنا الين ما نحكي الحكاية دي لأحفادنا ...ودمتم بخير 

نقطة و اقلب الصفحة.....لا بس فتحت صفحة جديدة علشان صارت تقيلة الاولى. و الصفحة الاولى صارت في اليمين.